حصلت “ترند بيروت” على تسجيل صوتي بشكل حصري (التسجيل برابط اليوتيوب)

التسجيل يفضح الشيخ الموقوف خلدون عريمط ويثبت أنه كان يزعم تواصله مع المملكة العربية السعودية عبر أمير اخترعه وهو أبو عمر كما أتى على ذكر السفير السعودي السابق وليد البخاري ووزير سعودي من دون ذكر اسمه وذلك أكثر من مرة..

وفي معلومات خاصة، سألت القاضية رلى عثمان في احدى الجلسات، الشيخ عريمط: هل استخدمت اسم المملكة او اي من ممثليها الرسميين، فأقسم عريمط بالنفي..

ومن المؤسف أن شيخا يقسم كذبا.. الحقيقة تظهر بالتسجيل الصوتي الذي خضع للتدقيق وتأكدت صحته وعُرض امام القاضية عثمان وسنبثه في هذا التقرير كاملا..

لكن لا بد من التوضيح ان التسجيل هو عبارة عن مكالمتين بين عريمط وصديق رجل الأعمال العكاري أحمد حدّارة ويدعى رضوان الخالد

اذ بادر عريمط بالاتصال برضوان لكن الخط انقطع، فأبلغ رضوان حدّارة عن اتصال عريمط، فقال حدارة لرضوان: اتصل به وسجّل المكالمة وذلك لشك حدارة بعريمط

وفي ما يلي تفريغ حرفي للتسجيلين:

رضوان الخالد (صديق أحمد حدّارة): عم قول أنا اذا في شي بيقرّب وجهات النظر فيي انقلّو رسالة وكذا ما عندي مشكل بس هوي حسيتو ما عطاني فرصة لانو عم يقللي انو الملف مش بايدي وانا هيدا الموضوع شوي بيأثّر عليي.. ما بعرف

خلدون عريمط: لا لا الموضوع هيدا هوي المشكلة وين انو في اخواتو  

أنا الموضوع مع اخوانّا (السعودية) انا حليتو.. محلول مع اخوانّا.. مع اخوانّا محلول.. عرفت كيف وهنّي بالجو.. لكن في لقلّك كيف صاير..

اخواتو عم يبعتو بعض الرسائل الغير مناسبة

رضوان: يعني المقصد انو تجريح بشخصك؟

خلدون عريمط: أيوى.. وعم يبعتو رسائل على الواتسآب.. رلجمعية عنّا بالمنطقة جمعية أنا.. زوجتي رئيستها الجمعية قدّموا مساعدات ففي اخواتو عم يحددوا انو لا المبالغ اللي اندفعت للجمعية بدا ياها عرفت كيف؟

أما الموضوع مع السفير (السعودي) فهيدا محلول يعني.. وفي سوء تفاهم في سوء التفاهم توضّح لدى اخوانا بالسعودية.. اتوضّح لدى اخوانا بالسعودية ر  أنا المهم انو أنا أقعد أنا ويّاه الموضوع اللي عم يتصرفوا فيه اخواتو وعم يبعتو كلام غير مناسب.. يعني ما حلوة.. ما بدّي صعّب الموقف ما حلوة كتير..

رضوان: لا لا أنا بنقلّو الصورة بهيدا الموضوع

خلدون عريمط: الكلام اللي بعتّوه انو في مبلغ أو مبالغ اندفعت.. تصور وقت اللي بيقول انو حتى الغدا اللي اتغديناه بدنا حق الغدا.. تصوّر وقت اللي بيقولو انو حتى الغدا بدنا ياه .. بتتذكّر تغدينا سوا نحنا وياه

رضوان: هلق خليني أنا انقلّو الصورة وشوف شو ردّو.

خلدون عريمط: هوي بالامارات ولا برّات الامارات؟

رضوان: هوي بعتقد انو بلبنان على الأرجح انو بلبنان

خلدون عريمط: لانو أنا بالامارات عندي عم تابع علاجي يعني.. عندي علاج بالامارات..

رضوان: الله يشفيك.. أنا اللي عرفتو انو بلبنان..

خلدون عريمط: في دفع أكثر من تبرّع للجمعية اللي بتترأسها زوجتي بافطارات رمضان وما رمضان ومساعدات.. اللي عم يطالبوا عم يطالبوا بالمبالغ اللي دفعوها للمساعدات عرفت كيف؟

هلق الموضوع مع الأمير (الأمير السعودي الوهمي) ومع الوزير ومع… محلولة هيدي القصة.. القصة محلولة وتوضّحت الصورة وبعتّلو الصورة كاملة وعرفو شو الموضوع نهائيا من طأطا للسلام عليكم.. معروفة القصة.. صارت القصة معروفة..

أما التهديدات اللي عم يعملوها اخواتو.. انا ما بدي صعّد الموقف.. ما حلوة صعّد الموقف..

رضوان: لا لا ان شاء الله انتو أهل وانا هلق ببعتلو وبشوف شو ردّو..

خلدون عريمط: انا رأيي قعود انت وياه مع بعض واذا بدّو بعيدا عن الاجواء.. بقعد انا وياك وهوي.. بقعد انا وياك وهوّي بدون اعلام بدون شي

رضوان: بطرح عليه هيدا الطرح وبرجعلك ان شاء الله.. عطيني شوية وقت وبرجعلك ان شاء الله..

خلدون عريمط:  جلسة خاصة انا وياك وهوي منقعد مع بعضنا ومنحكي بكل التفاصيل..

الاتصال الثاني:

رضوان: الله يعطيك العافية..

خلدون عريمط: ربنا  يحميك ان شاء الله..

رضوان: فضيلتك أنا هلق قدرت أوصل لأحمد حدّارة.. عم قلّو واحد – 2 – 3.. فقللي: رضوان هيدا الملف ما فيي اتصرف فيه لانو أنا عندي تعليمات قطعية ما بعرف أنا شو الخلفيات.. قللي بس انو ذكرلي الأمير فرحان ومين التاني البخاري انو بعدم التقارب أو التواصل مع.. قلتلو ولك يا عمي ليش هلقدّ الملف كبير؟ قال ايه ملف كبير ولقيتو يعني ما عطاني فرصة ما عطاني كتير فرصة لحتى اتعمّق بالموضوع.. قللي هيدا الملف أنا بس يقللي الأمير فرحان اقعد مع فضيلتو بقعد مع فضيلتو.. غير هيك الملف مش عندي

خلدون عريمط: ايه على راسي.. أنا هيدا الموضوع محلول عندي .. قلو مع الجماعة (السعودية) محلول وفي أحيانا عم يبعتو رسائل في رسائل عم تجي من اخواتو (أحمد حدارة) .. يعني أنا حريص جدا عالموضوع..

رضوان: والله هوي هلق ما فتحلي.. بس قللي انو في شخص موقّف وقوة ضاربة وبديش انا فوت بهاللتلتة ووجع الراس وملف كبير.. يعني ما حسيتو بدو يفصّلي بالموضوع فقلت بلا ما احرجو أنا وفوت بملف أنا مش فيه.. اذا انت عندك شي وانا انقلّو ياه بيقرب وجهات النظر أنا ما عندي مشكلة..

ألو…

تجدر الاشارة الى أن الشيخ عريمط يُحاكم بقضيتين
القضية الأولى: تعكير صلات لبنان بالمملكة العربية السعودية.

والقضية الثانية رفعها وكيل أحمد حدارة بتهمة التشهير والابتزاز وتشويه السمعة واختلاق جرائم.

ترند بيروت ستبث تباعا سلسلة تقارير مليئة بالصور والفيديوهات تعرض للمرة الأولى وتواكب القضية التي هزّت الرأي العام وقلبت الموازين في لبنان..

في التقرير التالي:

كيف بدأت علاقة خلدون عريمط واحمد حدارة وكيف انتهت؟

وما هي قيمة المبالغ الفعلية التي حصل عليها عريمط من حدّارة؟…